Jahon oltin bozori kapitallashuvi 20 trln dollardan oshdi

Jahon oltin bozori kapitallashuvi 20 trln dollardan oshdi

Jahon oltin bozori kapitallashuvi 20,8 trln dollardan oshdi. Hozirga qadar qariyb 272 000 metrik tonna oltin topilgan, shu jumladan 217 000 metrik tonnasi tarix davomida qazib olingan, 55 000 metrik tonnasi esa yer ostidagi zaxiralarda qolmoqda.

2024-yilda jahonda oltin ishlab chiqarish 3 670 metrik tonnani tashkil etdi. Yana 1 370 metrik tonna qayta ishlash hisobiga olindi. 2024-yilda Xitoy jahon oltin ishlab chiqarishida yetakchilikni saqlab qoldi va qazib olish hajmini 0,6% ga oshirib, 377 tonnaga yetkazdi.

Oltin qiymatining o’sishi, birinchi navbatda, jahon iqtisodiyotidagi noaniqlik, inflyatsiyaning o’sishi, G’arb mamlakatlarida, jumladan AQShda chakana savdoning zaifligi, dunyoning eng yirik o’yinchilari o’rtasida boshlangan savdo va texnologik urushlar, mamlakatlar davlat qarzining o’sishi va, albatta, geosiyosiy noaniqlik bilan izohlanadi.

Bunday noaniqlik sharoitida oltin jahon investorlari va davlatlar uchun xavfsiz boshpana aktivi sifatida jadal mustahkamlanmoqda. Shuni ta’kidlash kerakki, yil boshidan buyon oltin qiymati 14% dan ko’proq oshdi. Bir qator yirik investitsiya banklari yil oxiriga oltin narxi bo’yicha prognozlarini oshirmoqda. Masalan, 5 trln dollar kapitalni boshqaradigan eng yirik Shveytsariya banki UBS Group bir untsiya oltin narxi qariyb 3200 dollarni tashkil etishini kutmoqda. Avstraliyaning Macquarie Group investitsiya banki ikkinchi chorakda oltin qiymati 3500 dollargacha o’sishini prognoz qilmoqda. Fransiyaning BNP Paribas moliyaviy konglomerati oltinning o’rtacha narxi 3000 dollardan oshishini kutmoqda. Bugungi kunda spot bozorda bir untsiya oltin narxi 3041 dollarni tashkil etadi.